Ministri austriak telefonon Xhafaj: Të mos përsëritet 2015 me klandestinët!

Ministri austriak telefonon Xhafaj: Të mos përsëritet 2015 me

Austria duket se është e alarmuar nga rritja e emigrantëve nga vendet e treta të cilët kalojnë përmes vendeve të Ballkanit drejt vendeve të BE-së.

Për këtë Ministri i Brendshëm i Austrisë,  Herbert Kickl ka zhvilluar një bisedë telefonike me homologun e tij shqiptar Fatmir Xhafaj.

Ministri Xhafaj duke vlerësuar këtë shqetësim, e njohu homologun austriak me masat e shtuara të Policisë së Shtetit, për menaxhimin dhe përballjen e kësaj situate, veçanërisht përgjatë vijës kufitare me Greqinë.

Por pavarësisht masave të shtuara, vihet re një numër në rritje i migrantëve që depërtojnë përgjatë kufirit me shtetin grek.

Një pjesë e tyre kërkojnë azil, një pjesë sistemohen në Qendrat e Përkohshme të Pritjes, por qëllimi i tyre final mbetet rrugëtimi në vendet e BE-së.

Xhafaj garantoi homologun Kickl se Shqipëria do të bëjë të gjitha përpjekjet për të parandaluar këtë fenomen, megjithë burimet e pakta në dispozicion.

Në këtë kontekst, nënshkrimi sa më shpejt i marrëveshjes së dakordësuar tashmë me FRONTEX, do të ketë një ndikim të posaçëm.

Ministri Kickl, duke vlerësuar përpjekjet e palës shqiptare, sugjeroi që këto çështje të jenë në rendin e ditës në takimin rajonal që mbahet në Brdo të Sllovenisë, në fillim të qershorit.

Ai sugjeroi që të vijojnë takimet në nivel operacional, për një qasje të koordinuar mes shteteve për këtë situatë, veçanërisht sa i takon luftës kundër kontrabandistëve të personave, për të shmangur një situatë si ajo e vitit 2015. 

"Nëse do të ndodhemi në një situatë të ngjashme, - u shpreh ai, – Qeveria austriake është e vendosur të mbrojë kufijtë e saj dhe të shteteve të tjera". 

Në këtë aspekt, Ministri austriak theksoi nevojën e veprimeve të mirë-koordinuara mes shteteve.

Ministri Xhafaj, nga ana e tij, ndau të njëjtin mendim me homologun dhe theksoi domosdoshmërinë për një takim të drejtuesve të kufirit të vendeve të rajonit, i cili  të konkludonte në një plan operacional të përbashkët.

Më pas, ai propozoi një takim të Ministrave të Ballkanit Perëndimor së bashku me Austrinë, Italinë dhe Slloveninë për të koordinuar politikisht përpjekjet në këtë drejtim.

Dy bashkëbiseduesit ri-diskutuan propozimin e palës shqiptare, për ngritjen e Qendrës Rajonale të Bashkëpunimit Policor dhe Ndërkufitar, e cila do të trajtojë edhe këto çështje.

Ministri Xhafaj kërkoi që BE-ja të konsiderojë një paketë financiare, të domosdoshme për të mbështetur menaxhimin e kufijve në Ballkanin Perëndimor.

Ministri Xhafaj i bëri me dije homologut të tij, se shumë shpejt do të paraqesë gjithë propozimet e palës shqiptare në një dokument të vetëm, gjë që u mirëprit nga z. Kickl. 

Ky i fundit, u shpreh në mbështetje të propozimeve të palës shqiptare për Qendrën Rajonale të Bashkëpunimit Policor. Ai sugjeroi që kjo të jetë temë e konferencës për Ballkanin Perëndimor që do të mbahet në shtator.

Ministri Kickl theksoi se ajo mbetet një projekt i rëndësishëm i Presidencës austriake të BE-së, në 6-mujorin e dytë të këtij viti.

Sipas Ministrit të Brendshëm të Austrisë, kriza ka sjellë një farë tensioni, por ana pozitive e saj, janë përpjekjet e palës shqiptare për menaxhimin e kufijve, gjë për të cilën ai shprehu vlerësime.

EMISIONET