Kryetari i Bashkisë së Tiranës, Erion Veliaj ishte në një nga familjet që kanë pranuar të strehohen në banesat sociale pas prishjes së shtëpisë në Unazën e Re. Benjamin dhe Zymbyle Pira jetonin në kushtet të vështira në një nga banesat pa leje që preken nga projekti i zgjerimit të Unazës së Madhe.

Veliaj u tha atyre se mund të rrinë pa afat në shtëpinë e dhënë nga bashkia.

Veliaj: Ne kemi mbrojtur hebrenjtë, nuk i la njeri në Tiranë pa bukë e pa shtëpi, jo më njeri-tjetrin, por tani duhet të kuptojmë: Edhe rruga të bëhet, edhe njerëzve t’u japim shtëpi! Ju garantoj se jo vetëm ju, por të gjithë ata që do aplikojnë pas jush, kushdo që do të bashkëpunojë dhe do thotë, ore unë dua të bëhet rruga, por më ofroni diçka, ne jemi këtu që të ofrojmë diçka! Këtu, banesat i kemi pa limit kohor.

Ndërkohë nga Unaza e Re, deputetja e PD, Albana Vokshi denoncoi faktin se në takimin e së martës me Veliajn në  bashki, nuk ishin banorët e unazës.

Vokshi: Ju ftoj te beni transparence per mbledhjen e Veliajt ne bashki me banore te pretenduar te Unazes se Re. Personat ne foto ne takim me Veliajn jane police bashkiake. Jane punonjes se bashkise, jane rrogetare te Veliajt. Me intrigen e tij Veliaj kerkon te mashtroje banoret por nuk ka per tia arritur. Fton te gjitha mediat, edhe kombetare, qe te hetojne per kete takim dhe per projektin korruptiv. Si nene kam nje apel per te gjithe shqiptaret ne kete dite te bashkimit qe te solidarizohen me protesten dhe kauzen e drejte te banoreve te Astirit.

PD më pas bëri të ditur se policët bashkiakë në foto janë identifikuar si Gazmend Vathi, Alban Saliaj, Sokol Abedini, Blerim Nela dhe Redi Ruka.

/Ora News.tv/