Meta publikon mesazhet për manifestimin e 2 marsit: Le ta dëgjojë e gjithë bota
Presidenti Ilir Meta ka zgjedhur të mos vijojë këtë fundjave më denoncimet e premtuara, sipas tij për shkeljet e bëra ndaj kushtetutës së vendit. Megjithatë mesazhet në facebook nuk kanë munguar.
Duke paralajmëruar pjesëmarrje masive në 2 mars, Kreu i Shtetit ka sjellë në vëmendje protestat në Lindjen e Mesme apo të quajtur "pranvera arabe".
"Pranvera po afron! Të dashur qytetarë! Në manifestimin historik të 2 marsit ju ftoj të gjithëve t'u përmbahemi vetëm këtyre mesazheve:
PËR KUSHTETUTËN!
PËR SHQIPËRINË!
JO GRUSHTIT TË SHTETIT!
JO SHPOPULLIMIT!
TË GJITHË TË BARABARTË PARA LIGJIT!"
Për ata që do të jenë në protestë, kreu I shtetit I ka ftuar të mos kenë flamuj të partive.
"Dhe meqenëse jemi kthyer 30 vjet pas, le ta dëgjojë e gjithë bota mesazhin e Shqiponjave:
LIRI DEMOKRACI!
E DUAM SHQIPËRINË SI GJITHË EUROPA!
Ju ftoj të vini vetëm me flamuj kuq e zi! Ju përshëndes të gjithëve me këtë foto të jetës time!"
Prej ditësh Kreu i Shtetit ka publikuar dokumente përmes të cilëve akuzon se është shkelur kushtetuta në propozimin e emrave për anëtarë të Gjykatës Kushtetuese.