Itali, arrestohet i riu shqiptar, kërkohej në Gjermani për vrasje
Policia italiane ka vënë në pranga në aeroportin Malpensa një të ri shqiptar, i cili kërkohej në Gjermani për një vrasje të ndodhur në qytetin Aachen.
Mediat italianë thonë se bëhet fjalë për një 23-vjeçar shqiptar, identiteti i të cilit ende nuk bëhet i ditur.
Malpensa24.it shkruan se shqiptari u kap në momentin kur do të udhëtonte me avion drejt Tiranës, por u zbulua se në fakt ai kërkohet nga autoritetet gjermane.
Shqiptari që rezultonte në kërkim ndërkombëtar, akuzohet për vrasjen e një vajze 18-vjeçare në Gjermani gjatë një grabitje të ndodhur në Janar të vitit 2017. Adoleshentja mbeti e plagosur nga goditja me thikë, por ndërroi jetë në spital. Pas grabitjes me pasojë vrasjen, 23-vjeçari ishte arratisur nga Gjermania.
Tashmë i arrestuar në Itali, shqiptari do të ekstradohet në shtetin gjerman për t’u përballur me akuzat.