Vlorë, nis prishja e ndërtimeve pa leje për zgjatimin e Lungomares
IKMT nisi prishjen e ndërtimeve pa leje në bregdetin e Radhimës për ti hapur rrugë projektit të zgjatimit të Lungomares drejt Orikumit. Pronarët e bizneseve dhe banorët e punësuar pranë tyre kërkuan të njihen me projektin para se tu shemben objektet.
Fadromat e Inspektoratit Kombëtar të Mbrojtjes së Territorit mbërritën në Radhimë në kuadër të aksionit për prishjen e ndërtimeve pa leje në bregdet.
Aty nisi prishja e dhjetëra objekteve kryesisht buzë detit të ndërtuara pa leje.
Shembja e tyre i hap rrugë projektit “Lungomare 2” që e çon shëtitoren drejt Orikumit.
Aksioni u ndoq nga Kreu i IKMT, Dallëndyshe Bici, ndërsa u kundërshtua nga pronarët e bizneseve dhe banorë të zonës të punësuar pranë tyre.
Ata kërkuan të njihen me projektin para se bizneset tu rrëzohen
Aksioni i IKMT kundër ndërtimeve pa leje në bregdetin e Vlorës nisi në fillim të Shtatorit nga zona e Ujit të Ftohtë, aty ku nis edhe zgjatimi i shëtitores.
Pronarët e objekteve pa leje të njoftuar më herët për prishjen nuk e kundërshtuan aksionin në nisje.