Festa dhe sfidat e policisë, Ademi: Vetingu të mos jetë selektiv si në gjyqësor

Festa dhe sfidat e policisë, Ademi: Vetingu të mos jetë selektiv

Në 107 vjetorin e krijimit të Policisë së Shtetit, kryebashkiakja e Shkodrës, Voltana Ademi i kujtoi sfidën e pastrimit nga elementët e korruptuar, ndërsa uroi që vettingu të mos bëhet selektiv si ai në drejtësi. Ceremoni u mbajtën në të gjithë vendin.

13 janari është festë për Policinë e Shtetit. Por në 107-vjetorin e themelimit, kryebashkiakja demokrate e Shkodrës, Voltana Ademi, u kujtoi sfidën pastrimit nga efektivët e lidhur me të inkriminuarit apo të vënë sipas saj në shërbim të politikës.

Voltana: Spastrimi i rradhëve të saj nga elementë të inkriminuar, bashkëpunëtorëve të kriminelëve të rrugës dhe atyre me kollare, duhet të dalin një orë e më parë nga rradhët e policisë së shtetit.

Pastrimin e strukturës nga ata që nuk e meritojnë uniformën pritet ta bëjë vettingu në Polici për të cilin kryebashkiakja e një prej qyteteteve të goditura rëndë nga krimi uroi të mos bëhet si ai në drejtësi.

Ademi: Edhe pse prej muajsh po flitet për vetting edhe në rradhët e Policisë së Shtetit, akoma nuk ka rezultate të prekshme e të besueshme. Uroj që vettingu në Policinë Shtetit të mos jetë nën shembullin selektiv të atij në sistemin e Drejtësisë.

Edhe pse nuk ishte dita e analizës, zëvendësdrejtori i Policisë së Qarkut foli për rritje të sigurisë publike.

Lorenc Meta: Sot qarku i Shkodrës është shumë më i sigurt për pronën dhe jetën e qytetarëve, bizneset dhe turistët që na vizitojnë.

Ceremoni të ngjashme u mbajtën në të gjithë drejtoritë e policisë, ku u bënë bashkë efektivët në detyrë me ata që më parë e kanë mbajtur këtë uniformë.

"Jini më të dashur me popullin dhe më të rreptë në zbatimin e ligjit."

Pjesë e festës së policisë ishin edhe klerikët e drejtues të organeve të tjera të drejtësisë, që bashkëpunojnë me këtë strukturë në hetimin e ngjarjeve.




EMISIONET