Padia për shpifje, Berisha: Balla fshihet pas imunitetit, gjykata ka frikë të shprehet

Padia për shpifje, Berisha: Balla fshihet pas imunitetit, gjykata ka

Djali i ish-kryeministrit Berisha, Shkelzen Berisha akuzoi deputetin socialist Taulant Balla se fshihet pas imunitetit të deputetit.

Pas daljes nga Gjykata e Krimeve të Rënda ku mori pjesë në seancën gjyqësore për padinë që ai ka ngritur ndaj Ballës për shpifje lidhur me mospagimin e taksave, deklaratë kjo e bërë në Komisionin Hetimor për CEZ, Berisha tha se Gjykata ka frikë të shprehet.

Berisha: Për të dhënë drejtësi, duhet të kuptoni gjendjen ku ndodhet drejtësia sot, kanë frikë të thonë nëse kjo është apo jo një shpifje.

Pyetje: Po qëndrimi i Prokurorisë, e cila tha se vendimi i mëparshëm i gjykatës së Lartë është i padrejtë, si e gjykoni ju?

Berisha: Gjykata e Lartë është institucioni më i lartë i këtij vendi kur vjen puna në çështjet e drejtësië dhe vetëm një kryeprokuror, një përfaqësues i kryprokurorit Edi Rama dhe një kryeprokuror ose një gjykatës që ka frikë mund ta kthejë ose ta marrë këtë si argument dhe ta kthejë prapë çështjen në Gjykatën e Lartë.

Pyetje: Patët një replikë me Ballën, ai deklaroi se kjo çështje është në hetim për të cilën unë akuzohem, ju kërkuat prova aty.

Berisha: Ju jeni gazetar, keni lidhjet tuaja në prokurori dhe gjykatë, sikundër unë është hera e parë që dëgjoj diçka të tillë. E vërteta është krejt tjetër. E vërteta është se Balla e ka ngritur këtë shpifje gjatë komisionit hetimor parlamentar për këtë arsye është sjellë këtu si shpifës jo për arsye se unë kam dëshirë ti vë një damkë të dytë si shpifës, se ai e ka një damkë si shpifës, por sepse kam dashur që publiku përveç përgjigjes mediatike të marrë një përgjigje ligjore për sa i përket kësaj çështje.

Pyetje: Keni dëshmuar për CEZ në prokurorinë e Tiranës, keni një koment?

Berisha: Këto çështje janë të ndryshme, kjo çështje është për shpifjen e Ballës që thotë se unë në 2009-2011 nuk kam paguar asnjë taksë. Unë vetëm në vitet 2009-2010, nuk po flas për 2008, kam paguar mbi 50 milion lekë taksa pa llogaritur taksat e biznesit. Sa i përket prokurorisë kam thënë ato gjëra që kam thënë sa herë kam dalë nga komisioni, kjo është një shashkë politike që nuk përcjell asnjë fakt, asnjë provë. Në zbatim të ligjit unë kam shkuar në prokurori siç kam shkuar para komisionit dhe kam thënë ato që kam deklaruar para jush që asnjë e ardhur e imja, asnjë kontakt i imi nuk ka lidhje as me privatizimin as me aktivitetin e CEZ në Shqipëri.

Pyetje: Cilat janë pritshmëritë tuaja?

Berisha: Pritshmëria ime është të dalë e vërteta. Taulant Balla ka dalë dhe ka thënë që unë nuk kam paguar asnjë taksë për tre vite.Unë kam me vete dokumenta nga Tatimet që deklarojnë se vetëm në dy vite kam paguar 50 milion lekë taksa. Unë vi këtu në respekt të ligjit, njeriu që nuk respekton ligji është shpifësi që do të flasë pas meje sepse është i vetmi kryetar grupi parlamentar në Europë që nuk zbaton vendimin e formës së prerë të Gjykatës së Apelit. Është dënuar si shpifës, është dënuar që duhet të paguajë shpifjen dhe fshihet pas imunitetit, Edi Ramës që e trajtion si tualet dhe nuk paguan detyrimin për shpifje. Nëse ky vend do të kishte prokurori, nëse prokuroria do të kishte sado pak dinjitet duhet ta kishte proceduar penalisht sepse refuzon të zbatojë vendimin e formës së prerë të gjykatës. Nuk kam asnjë pritshmëri përpos së vërtetës. 

Pyetje: Në proces kërkonit dënimin e Ballës apo dëmshpërblim financiar?

Berisha: Dëmshpërblimi financiar kërkohet në një padi civile por sigurisht ka dhe një kërkesë për dëmshpërblim financiar, kryesisht është dënimi i shpifësit dhe mbi të gjitha transparenca që kjo është shpifje.

Taulant Balla është paditur nga Shkelzen Berisha për shpifje dhe sot Gjykata e Krimeve të Rënda shpalli moskopetencen dhe ktheu dosjen sërisht në Gjykatën e Lartë. 



EMISIONET