Bashkia e Tiranës do të vendosë në dispozicion fondin prej 1 milion dollarësh në ndihmë të të prekurve nga tërmeti. Teksa kontribuoi personalisht me ndihma për të dëmtuarit në  pikën e ngritur nga Bashkia e Tiranës në sheshin “Skënderbej”, kreybashkiaku Erion Veliaj deklaroi se janë marrë të gjithë masat për menaxhimin e kësaj situate.

Veliaj: Do të akordojmë një fond të Bashkisë së Tiranës, rreth 1 milion dollarë për këtë fazë të parë të emergjencave. Do të kemi një mbledhje jashtë radhe të Këshillit Bashkiak, pikërisht për të adresuar këtë çështje.

Veliaj vlerësoi edhe kontributin e qindra qytetarëve që i janë përgjigjur menjëherë thirrjes për të kontribuar me veshje dhe ushqime për njerëzit e prekur nga tërmeti.

Veliaj: Qindra qytetarë kanë dhuruar ushqime, rroba e veshmbathje, për disa familje, sidomos ato në zonat rurale. Kriza nuk do mbarojë me sot e nesër, por do të vazhdojë derisa të rehabilitohen plotësisht të gjithë. Për këtë arsye është shumë e rëndësishme që të gjithë qytetarët që duan të bëjnë diçka, që nuk merren me llafe e nuk japin mend për gjëra kot, por që duan realisht të bëjnë diçka konkrete e kanë një mundësi, të vijnë të dhurojnë këtu. Kemi pasur një stok të konsiderueshëm në qendrën tonë të Emergjencave Civile në Farkë për të përballuar valën e parë dhe do mirëpresim kontributet e qytetarëve.

Veliaj theksoi se të gjithë grupet e punës do të vijojnë të jenë në terren për tu ardhur në ndihmë njerëzve në nevojë.

/Ora News.tv/