Apeli i fundit për ndërtuesit, Rama: Merrni përsipër riparimet ose do të shkoni në burg! Nismë dhe për shtesat pa leje

Apeli i fundit për ndërtuesit, Rama: Merrni përsipër

Kryeministri, Edi Rama, përsëriti edhe njëherë apelin për ndërtuesit e pallateve, apartamentet e të cilave kanë pësuar dëme të lehta jo strukturore që të paraqiten për të bërë deklarimin dhe të marrin përsipër të gjithë riparimin dhe dëmet materiale që u janë shkaktuar njerëzve.

Shefi i qeverisë insistoi që këtë procedurë ta kryejnë sa më shpejt, pasi çdo ditë që kalon i afron ata më afër burgut.

Paralajmërimin Rama e bëri në mbledhjen e jashtëzakonshme të qeverisë mëngjesin e sotëm, 2 dhjetor 2019.

Rama: Jemi duke punuar dhe besojmë se do ta konkludojmë shpejt dhe  kuadrin e ri ligjor dhe penal për abuzimet në ndërtim. Njësia speciale kundër korrupsionit ka filluar të përgatisë gjithë hartën e veprimeve për të identifikuar përgjegjësi në godinat problematike.

Dua të bëj një apel për të gjithë ata që kanë ndërtuar godina kolektive dhe sot hyjnë te godinat e  dëmtuara por jo të rrezikshme që të paraqiten vetë urgjentisht në zyrën përkatëse të drejtuesit të plotfuqishëm për emergjencën apo zyrën e shtabit të emergjencës në Durrës dhe të bëjnë deklaratën e gatishmërisë për ti paguar një më një vetë godinat, të gjitha riparimet nga ato sipërfaqësore deri te dëmet materiale që i janë shkaktuar njerëzve.

E bëj këtë apel sepse shumnë shpejt do të jetë vonë për ta. Kush do ti shmanget këtij detyrimi do të jetë i akuzuar drejtëpërdrejtë përpara  organeve të drejtësisë, do ta çojmë ne në akuzë dhe do të kërkojmë burgim për papërgjegjshmëri. Bëhet fjalë për dëmtime që nuk kërcënojnë qëndrueshmërinë e godinës, por që vënë në pamundësi banueshmërinë e saj dhe që kanë të bëjnë me abuzime të ardhura pas,  gjatë ekzekutimit të lejes së ndërtimit.

Është e vërteta e sigurt që ndërtimet e reja të bëra që nga mesi i viteve '90 dhe pas, 99% e tyre kanë qëndruar më së miri. Pjesa tjetër, shumë e vogël, në 99% të rasteve është abuzivizëm nga individë dhe jo kompani që kanë ndërtuar shto ujë dhe shto miell dhe në një për qindje të vogël nga kompani që kanë abuzuar me vetë lejen.

I kam kërkuar drejtuesit të plotfuqëishëm për emergjencën dhe një raport i cili do të përgatitet me pushtetin vendor për katet e shtuara mbi leje, janë një sërë katesh të shtuara mbi lejen që duhet të regjistrohen dhe për të cilat duhet të ndërmarrim një nismë të veçantë më pas.

EMISIONET