Krujë, fëmijët mësojnë në palestër
Fëmijët e Borizanës në Krujë po e mësojnë ABC në një palestër të përshtatur si klasë, pasi shkolla e fshatit u dëmtua nga tërmeti dhe do të shembet. Vështirësinë këto ditë ua kanë shtuar temperaturat e ulta, pasi dy rezistenca elektrike nuk e ngrohin dot ambientin sportiv. Ndërkohë më të rriturit shkojnë çdo ditë në Thumanë për mësim, por thonë se orët i zhvillojnë të shkurtra.
Palestra e shkollës së Borizanës është kthyer në klasë.
Aty zhvillojnë mësim më të vegjëlit e shkollës e cila është përcaktuar për tu shembur.
Por kushtet nuk janë aspak të përshtatshme.
Faqet dhe duart e kuqe të nxënësve tregojnë se dy furnellat elektrike nuk e ngrohin dot të gjithë hapësirën e palestrës.
Edhe për këtë shkak, mediat nuk janë të mirëpritura në këtë ambient.
"Si i filmon kalamajtë pa lejen e prindërve, ma hiq këtë."
Nga ana tjetër prindërit janë të shqetësuar, jo vetëm për cilësinë e mësimdhënies por mbi të gjitha për shëndetin e fëmijëve.
Ndërkohë 600 nxënës të tjerë nga klasa e dytë deri në vitin e tretë e ndjekin procesin mësimor në Thumanë.
Autobusët i marrin rreth mesditës dhe sipas nxënësve i kthejnë aty rreth orës 15:00.
Në këto kushte nxënësit thotë se procesin mësimor e zhvillojnë me orë të shkurtuara.
Shkolla e mesme e Borizanës u rikonstruktua vetëm pak vite më parë me një fond prej 85 milion lekësh.
Por ndërtesa nuk i rezistoi tërmetit të 26 nëntorit dhe Kryqi i Kuq tregon se ajo do të shembet.
Deri në ndërtimin e një shkolle të re, duket se nxënësit e Borizanës nuk do ti kenë të gjitha kushtet e kërkuara për zhvillimin normale të procesit mësimor.