Një 25-vjeçar nga Islanda, i cili vrau me thikë një shqiptar dhe plagosi një tjetër, përballet në gjyq me akuzën e vrasjes dhe vrasjes së mbetur në tentativë.

Dagur Hoe Sigurjónsson përballet edhe me detyrimin për dëmshpërblim për prindërit e viktimës, Klevis Sula (në foto).

Siç raportojnë mediat Klevisi dhe shoku i tij u sulmuan nga islandezi në Austurvöllur, periferi e Reykjavíkut, dhjetorin e kaluar. Sipas policisë, Dagur e goditi katër herë Klevisin: një herë në zemër, në krahun e djathtë e dy herë në shpinë. Po ashtu 25-vjeçari goditi tri herë edhe shqiptarin tjetër, në shpatull, krah e këmbë. Klevisi vdiq më pas në spital për shkak të plagëve.

Nëna e Klevisit kërkon nga gjykata dëmshpërblim prej 10 milion krona islandeze, rreth 80 mijë euro, si dhe 870 mijë krona të tjerë për mbulimin e shpenzimeve. I ati kërkon 10 milion krona, ndërsa i plagosuri kërkon dëmshpërblim 3.2 milion krona.

“Ai ishte i mrekullueshëm dhe donte t’i ndihmonte të gjithë. Fliste mirë për islandezët dhe i pëlqente njerëzit. Ishte shumë i lumtur këtu”, tha nëna e Klevisit, Natasha Sula pas vrasjes së të birit.

/Ora News.tv/