U arrestua për vjedhje, fierakut i gjenden në banesë armë e municion luftarak
Një 28-vjeçar është arrestuar nga policia e Fierit pasi ka vjedhur materiale në një kantier ndërtimi.
Por gjatë kontrollit të ushtruar në banesën e Marjus Zogës policia ka gjetur armë zjarri dhe municion luftarak.
Një armë zjarri automatik model 56 dhe një krëhër automatiku me 17 copë fishekë janë sekuestruar në cilësinë e provës materiale.
Marjus Zoga, banues në Roskovec, dyshohet se ka vjedhur në orët e para të mëngjesit, në vendin e quajtur "Jagodinë", një saldatriçe, 2 bombula gazi dhe një sasie nafte.
"Në orët e para të mëngjesit, në vendin e quajtur "Jagodinë" Roskovec, në kantierën Nr.185, nga rojet e një Shoqërie Private të Sigurimit Fizik, është konstatuar vjedhja e një saldatriçe, 2 bombula gazi dhe një sasie nafte.
Nga hetimet e kryera, rezulton se shtetasi Marjus Zoga është autori i dyshuar i kësaj vjedhje,"-raportoi policia.
Materialet i kaluan Prokurorisë pranë Gjykatës së Shkallës së Parë Fier për veprat penale "Vjedhje" dhe "Prodhimi dhe mbajtja pa leje e armëve dhe municionit luftarak" parashikuar nga Nenet 134 dhe 278 të Kodit Penal.
/Foto arkive