Nisën stuhitë e dimrit, moti i keq paralizon portet, probleme në rrugë
Moti i keq me stuhi ere e reshje shiu shkaktoi problematika në qytetet bregdetare. Në Durrës e Vlorë, është pezulluar puna në sektorët e peshkimit, ndërsa tragetët me Italinë janë nisur me mbi 7 orë vonesë, Përmbytje e vështirësi në lëvizjen e njerëzve dhe mjeteve edhe në rrugë.
Këto janë pasojat e motit të keq me erë të fortë e reshje të dendura shiu që përfshiu paraditën e së martës qytetin e Vlorës.
Lëvizja e njerëzve dhe mjeteve në disa prej rrugëve kryesore të qytetit bregdetar ishte e vështirë.
Ndërsa furtuna shkaktoi dëme në biznese, duke thyer xhama kryesisht në bulevardin e qytetit, ku disa pemë ende rrezikojnë të rrëzohen.
Forca e detit ndërkohë është 6 ballë në gji dhe 8 në det të hapur.
Prej ditës së hënë, peshkarexhat dhe anijet e tjera të vogla nuk lejohen të dalin në det.
Ndërsa trageti i linjës Vlorë-Brindizi, qëndron në radë në pritje të qetësimit të situatës për tu nisur drejt Italisë.
Koha e keqe që ka përfshirë vendin tonë por edhe Italinë ka shkaktuar probleme edhe në portin e Durrësit me lëvizjen e trageteve.
Tre tragetët e parashikuar për mbrëmjen e së hënës u nisën drejt Italisë me 8 orë vonesë.
Me vonesë pritet të mbërrijnë edhe tragetet nga Bari.
Sipas Kapitenerisë, forca e detit në Gjirin e Durrësit shkon deri në tetë ballë në det të hapur, ndërsa era mbi 70 km/h.
Në këto kushte është pezulluar dalja ne det e anijeve të tonazhit të vogël e të mesëm.
Në qytetin e Durrësit ndërkohë nuk pati probleme.
Ndërkohë në Sarandë, moti i keq mbajti larg brigjeve një anije turistike.
Ndërkohë reshjet e dendura shkaktuan përmbytje në disa segmente rrugore në Fier.
Në një bllok pallatesh në qendër të Fierit, banorët janë bllokuar për shkak të ujit që ka përmbytur hyrjet e pallatit.
Problematika pati edhe në qytete të tjera, por pa pasoja serioze.