Steinmeier i shqetësuar për "armiqësinë" mes Rusisë dhe Perëndimit

Steinmeier i shqetësuar për "armiqësinë" mes

Presidenti gjerman, Frank-Walter Steinmeier ka shprehur shqetësimin e tij për rritje të “armiqësisë” në mes të Rusisë dhe Perëndimit dhe ka bërë thirrje për shtim të përpjekjeve diplomatike për të përmirësuar marrëdhëniet e dëmtuara.

Steinmeier ka thënë në një intervistë më 15 prill se helmimi i ish-spiunit rus, Sergei Skripal dhe vajzës së tij Yulia në Britani muajin e kaluar ka qenë “incident shumë serioz”.

Mirëpo ai ka shtuar se “me po aq shqetësim duhet të shikojmë drejt marrëdhënieve të tensionuara mes Rusisë dhe Perëndimit, situatë e cila mund të ketë pasoja përtej këtij rasti”.

Sergei Skripal dhe vajza e tij Yulia janë dërguar në spital prej 4 marsit, pasi i janë ekspozuar një substance, e cila i ka lënë pa ndjenja të Sallsbëri.

Britani fajëson Rusinë për tentim-vrasje të Skripalëve, akuzë të cilën Moska e kundërshton ashpër.

Ky sulm ka tensionuar marrëdhëniet në mes të Perëndimit dhe Rusisë duke shtyrë në dëbime diplomatike reciproke dhe masa tjera.

Steinmeier është cituar të ketë thënë se derisa është në rregull që Rusia të përballet me pasoja për veprat e saj, siç edhe është demonstruar me vënien e sanksioneve për agresionin e saj në Ukrainë, “ne nuk mundemi të braktisim dialogun direkt”.

Sipas tij nuk mund të demonizohet e tërë Rusia vetëm për shkak të presidentit të këtij vendi, Vladimir Putin.

Sa i përket Sirisë, Steinmeier ka thënë se nuk do të ketë përmirësim derisa presidenti amerikan, Donald Trump dhe homologu i tij rus, Vladimir Putin të mos angazhohen për gjetjen e një zgjidhje.

“Natyrisht nuk mund të arrihet asgjë pa fqinjtë rajonalë, mirëpo gjithçka fillon me SHBA-në dhe Rusinë”, është cituar të ketë thënë ai.

“Putin dhe Trump i detyrohen botës për ta bërë hapin e parë”./REL

EMISIONET