"Po hamë perime me pesticide", të rinjtë demokratë sulmojnë me domate AKU-në në Durrës
Cilësia e dobët e ushqimeve dhe moszbatimi i ligjit nga ana e inspektorëve të Autoritetit të Kontrollit Ushqimor kanë nxitur të rinjtë e Forumit Rinor të Partisë Demokratike në Durrës të protestojnë sot përpara Drejtorisë së AKU-së.
Në mënyrë simbolike, të rinjtë demokratë goditën me domate zyrat e AKU-së.
Me pankarta në duar, ata kërkuan më tepër seriozitet dhe kontrolle nga ky institucion, duke theksuar se papërgjegjshmëria e inspektorëve që nuk zbatojnë ligjin po vret dita-ditës qytetarët.
"Inspektorët e AKU-së janë kthyer në gjobëmbledhësa, duke marrë ryshfete nga tregtarët dhe duke i lejuar ata të shesin produkte me hormone" janë shprehur ata.
Cilësia e ushqimeve dhe nxjerrja në tregje e perimeve me pesticide është ndër problemet më të mprehta për konsumatorin shqiptar, sidomos tashmë që temperaturat janë rritur ndjeshëm.
Vetë inspektorët e AKU-së e kanë të pamundur për të mbajtur nën kontroll situatën, ndërkohë që në periudhën e verës në zonën e plazhit tregtohen produkte të pakontrolluara.