Një tjetër rast i trafikut të drogës në rrugët e Modenas është goditur nga policia italiane, duke çuar në pranga një korrier.

Gjatë shërbimit mbikëqyrës në autostradë, policët kanë vënë re një automjet tip Golf Volkswagen me targa italiane, që udhëtonte me shpejtësi të lartë pavarësisht trafikut të rënduar. Makina u ndalua dhe shoferi u identifikua një shtetas shqiptar 38 vjeçar.

Nga një inspektim paraprak i automjetit, agjentët vunë re njolla të çuditshme dhe papastërti në zonën e dritave në tavanin e mjetit dhe mbeturina në pjesën e pasme të pasagjerit.

Policia filloi të çmontonte pjesën e tavanit, duke zbuluar një hapësirë ku ndodhej një pako e madhe e ngjashme me atë të kokainës me një peshë totale prej 1 kg e 184 gram. Lënda narkotike kishte mbishkrimin "Bisha".

Shqiptari u arrestua dhe u dërgua në burg për trafikim të paligjshëm të narkotikëve, ndërsa pritet të vlerësohet masa e arrestit.

/Ora News.tv/