Më pak gjela deti në Zadrimë
Zadrima e Lezhës është një nga zonat që ka krijuar traditë në mbarështimin e gjelit të detit.
Shpendët prej ditësh janë nxjerrë në shitje, buzë rrugëve nacionale apo në tregje.
Por ajo që vihet re është ulja vit pas viti e numrit të mbarështuar.
Fermerët më të vjetër e lidhin këtë më largimin e të rinjve ose refuzimin e tyre për tu angazhuar me një punë që sipas tyre kërkon shumë mund e në fund fitimi nuk është i sigurt.
Fermer: "Vetëm pleqtë merren sepse të rinjtë janë jashtë."
Mungesa e tregut për produktin shqiptar edhe si pasojë e importeve është një tjetër arsye pse fermerët e Zadrimës po largohen nga kjo traditë.
Fermer: "Përfitimet janë të dobëta."
Gjeli i Detit konsiderohet si mbreti i tavolinës së Vitit të Ri. Ndaj mjeshtrit e kuzhinës, propozojnë gjithmonë ide të reja si ky produkt mund të jetë më gjatë i pranishëm në menynë e shqiptarëve.
Altin Prenga: "Në një fshat shumë të vogël ne morëm lakrën dhe gjelin e detit. Me to gatuam një recetë që është e stinës. Shumë herë nuk është mungesa e tregut problemi por edhe tendenca e rinisë për të braktisur tokat."
Sot në Zadrimë mbarështohen deri në 20 mijë shpendë, rreth 7 herë më pak se para viteve '90, ndërsa kjo lidhet edhe me uljen e kërkesave.