37 mijë maturantë iu nënshtruan të mërkurën provimit të matematikës. Teza u publikua në rrjetet sociale vetëm pak minuta pas nisjes së testit. Ministria e Arsimit në një reagim  kërkoi nga Prokuroria nisjen e hetimeve për të vendosur para ligjit shkelsit. Ndërkohë maturantët pas daljes nga testimi konfirmuan vërtetësinë e përgjigjeve të publikuara në rrjetet sociale.

Maturantët në mbarë vendin testuan njohuritë në provimin e matematikës, testi i tretë në radhë pas gjuhës dhe letërsisë.

Ishin deputetë të Partisë Demokratike dhe përfaqësues të shoqërisë civile ata që publikuan në rrjetet sociale tezat e provimit vetëm pak minuta pas nisjes së tij.

I pyetur nga Ora News Rigels Xhemollari, një prej aktivistëve që publikoi testin, tha se teza nuk ka dalë nga gjimnazet e kryeqytetit por nga ata te rretheve.

Vetë maturantët u shprehën se iu nenshtruan një kontrolli te rreptë dhe nuk u lejuan me telefon, por konfirmuan sit ë vërteta tezat që qarkulluan në rrjetet sociale.

Gazetarja: Ma konfirmon që kjo tezë ka qenë teza e provimit tuaj?

Maturant: Po, teza e provimit

Nga provimi dolën me përshtypje të ndryshme, ku disa prej tyre e vlerësuan të lehtë e disa të tjerë mbi nivelin mesatar.

Maturant: Mesatar, shumë i thjeshtë nëse do kishe mësuar

Maturant: Shumë i lehtë

Maturant: Teza ishte mesatare

Maturant: Nuk ishte dhe aq i lehtë, por i bëmë.

I menjëhershëm ishte edhe reagimi i Ministrisë së Arsimit e cila i kërkoi prokurorisë të nisë hetimet për të vendosur shkelësit para ligjit. MASR theskon në njoftimin shpërndarë mediave se garanton publikun se ka marrë çdo masë për të garantuar fshehtësinë dhe integritetin e testeve të maturës në fazën e hartimit dhe shpërndarjes. 37 mije maturantë do ti nenshtrohen më datë 18 provimeve të fundit, atyre me zgjedhje.


Kjo nxiti ministrinë e Arsimit që t'i kërkojë prokurorisë të nisë hetimet për të zbuluar se kush i nxori testet dhe se shkelësit duhen vënë përballë ligjit të shkelësve, kushdo qofshin ata.

Njoftimi per shtyp i ministrise 

Ministria e Arsimit, Sportit dhe Rinisë u informua nga rrjetet sociale dhe mediat on-line lidhur me publikimin e disa fotove nga Testi i Matematikes qe u zhvillua në të gjithë vendin nga ora 10:00 -12:30. Konkretisht nga adresat në Facebook  e një qytetari dhe të një deputeti janë postuar,  foto te testit te matematikës, ndërsa testimi po zhvillohej në të gjithë vendin.

MASR garanton publikun se ka marre çdo masë qe parashikon ligji për të garantuar fshehtësinë dhe integritetin e testeve të maturës në fazën e hartimit dhe shpërndarjes ne 38 DAR dhe ZA, 206  mjediset ku zhvillohet provimi për 37 mijë maturantë të cilët mbikëqyren nga rreth 4300 administratorë dhe monitorues.

Ministria e Arsimit, Rinisë dhe Sporteve e konsideron shkelje te rendë të ligjit Nr.69/2012 “Për sistemin arsimor parauniversitar në RSH” dhe të akteve nënligjore, kopjimin e plotë apo te pjesshëm si dhe shpërndarjen dhe publikimin e testit.

Për këtë arsye i  kërkojmë organit të prokurorisë të fillojë hetimin e menjëhershëm të dy rasteve të bëra publike online, duke mundësuar vënien përball ligjit të shkelësve, kushdo qofshin ata.

/Ora News.tv/