Meta tha se do sakrifikohej si ai, por kush është Salvador Allende?
Presidenti Ilir Meta deklaroi sot se ishte gati të sakrifikonte veten e tij për zgjidhjen e krizës së rëndë që nuk është vetëm politike e institucionale të vendit.
Nga Pogradeci Meta tha se ishte gati të sakrifikonte nga mandati i tij si president deri tek jeta e tij si Salvador Allende për të ndaluar instalimin e një junte që mund ta kthente Shqipërinë 30 vite pas. Madje ftoi dhe të tjerët ta bëjnë këtë për të mirën e vendit.
Por kush është Salvador Alende dhe cila është historia e tij?
Politikani kilian Salvador Allende shërbeu si presidenti i vendit nga viti 1970 deri në 1973-shin, si dhe si kreu i qeverisë së koalicionit Bashkimi Popullor. Ai mbahet mend si marksisti i parë që zgjidhet president në një vend me sistem liberal demokratik.
Ai u zgjodh nga Kongresi për shkak se asnjë nga tre kandidatët për president në garë nuk mori shumicën e nevojshme.
Më 11 shator 1973, Allende u rrëzua nga pushteti nga një grusht shteti të organizuar nga ushtria ndërsa mediat kanë nënvizuar dhe mbështetjen e CIA-s.
Ndërsa trupat ushtarake hynin në pallatin “La Moneda”, Allende zotohej në një fjalim në televizion të mos dorëhiqej. Më vonë gjatë asaj dite ai vrau veten.
Por largimi i Allende-s nga pushteti që ishte zgjedhur në mënyrë demokratike, i la vend diktaturës ushtarake që e qeverisi Kilin nga viti 1973 deri në 1990-n. Në krye të juntës qëndroi gjenerali Augusto Pinochet.
Ushtria e justifikoi grushtin e shtetit me thyerjen e demokracisë dhe fillimin e krizës ekonomike gjatë presidencës së Allende-s.
Në atë kohë ushtria tha se qëllimi i grushtit të shtetit ishte “rindërtimi kombëtar”. Allende qëndroi në jetën politike të Kilit për rreth 40 vjet, duke mbajtur poste nga senator deri në zv./ministër.