Koreja e Veriut ka denoncuar konfiskimin e fundit të një prej anijeve të tij të ngarkesave nga Shtetet e Bashkuara si një "vjedhje e paligjshme" dhe kërkon kthimin e saj të menjëhershëm.

Departamenti i Drejtësisë i SHBA-së javën e kaluar tha se kishte kapur një anije mallrash të Koresë së Veriut që akuzohej për dërgesa të qymyrit të paligjshëm në kundërshtim me sanksionet e Kombeve të Bashkuara.

E njëjta anije ishte konfiskuar njëherë në prill të vitit 2018 nga autoritetet detare të Indonezisë.

Në një deklaratë të kryer të martën, agjensia zyrtare koreane e lajmeve njoftoi duke cituar një zëdhënës të ministrisë së jashtme të paidentifikuar se SHBA kishte tradhtuar frymën e një marrëveshjeje të takimit të vitit të kaluar midis udhëheqësit të Koresë së Veriut Kim Jong Un dhe Presidentit Donald Trump.

Në samitin e tyre të rëndësishëm në Singapor më 12 qershor 2018, Kim dhe Trump kishin rënë dakord për një deklaratë të paqartë që bënte thirrje për një Gadishull Korean pa armë bërthamore dhe për përmirësimin e lidhjeve dypalëshe. Takimi i tyre i dytë në Vietnam në shkurt u mbyll pa marrëveshje.

Deklarata e ministrisë së jashtme kundërshtoi rezolutat e Këshillit të Sigurimit të Kombeve të Bashkuara kundër Koresë së Veriut, me të cilat Shtetet e Bashkuara justifikonin sekuestrimin e anijes, si një shkelje të sovranitetit të saj.

Uashingtoni gabon nëse beson se mund të kontrollojë me forcë Phenianin, thuhet në deklaratën e Ministrisë së Jashme koreane, duke shtuar se do të jenë vigjilentë përballë sjelljes së SHBA-së në të ardhmen.

Anija, e njohur me emërtimin “Wise Honest”, konsiderohet ndër anijet më të mëdha të transportit të Koresë së Veriut. Kjo është hera e parë që Shtetet e Bashkuara konfiskojnë një anije koreanoveriore për shkelje të sanksioneve.

Masa e SHBA erdhi disa orë pasi Koreja e Veriut shkarkoi dy raketa me rreze të shkurtër të enjten.

Kim kërkoi qëndrim të plotë luftarak pas sekuestrimit të anijes së mallrave nga SHBA.

/Ora News.tv/