Me vendim të Ministrit të Brendshëm Italian Marco Minniti, dy emigrantë shqiptarë janë dëbuar nga territori italian si persona të rrezikshëm për sigurinë kombëtare.

Dy emigrantët shqiptarë të moshës 24 e 23 vjec konsiderohen si persona të lidhur me ambientet e ekstremizmit islamik e në bashkëpunim të ngushtë me njëri-tjetrit.

Hetimet investigative të Antiterrorizmit Italian kanë vërtetuar se njëri prej shqiptarëve të dëbuar i moshës 24 vjec, banues prej vitesh në komunën Lucera të Foxhias mbante kontakte me një tjetër shqiptar i cili ishte anëtar i një grup salafit. Pjesë e këtij grupimi ekstremist fetar  ishin dhe dy vëllezërit  shqiptarë Orkid e Lusien Mustaqi 26 e 23 vjec, të dëbuar nga Italia në korrrik të 2017.

Gjithashtu investigatorët italianë kanë zbardhur se 24 vjecari shqiptar ishte anëtar i një grupi në whatsApp ku nxitej xhihadi si dhe përmes profilit të tij në facebook kishte shpërndarë shumë herë propagandë anti perëndim.

Ndërsa shqiptari tjetër i dëbuar i moshës 23 vjec, sipas autoriteteve italiane ishte pranë një grupi kriminal shqiptar që vepronte në Foxhia e me aktivitet në trafikun e qënieve njerëzore.

Gjithashtu në profilin e tij në facebook 23 vjecari kishte pozuar me një pistoletë në dorë.

Dy shqiptarët janë dëbuar nga Italia duke u nisur nga Bari drejt Durrësit.

Deri më tani ka mbërritur në 100 numri i personave të dëbuar  nga Italia, përgjatë vitit 2017 me motivin e rrezikshmërisë për sigurinë kombëtare.

/Ora News.tv/