IRTC drejt largimit, Qeveria fton investitorët në dy rafineritë në Fier dhe Ballsh

IRTC drejt largimit, Qeveria fton investitorët në dy rafineritë

Kompania IRTC e cila ka në përdorim dy rafineritë e naftës në Fier e Ballsh është drejt largimit. Ministri i Financave dhe Ekonomisë Arben Ahmetaj ftoi të gjithë investitorët e interesuar të sjellin propozimet për rafineritë e ARMO-s. Por një tjetër zë i rëndësishëm i mazhorancës mendon se zgjidhje për këtë kompani do të ishte shtetëzimi. Ndërkohë punonjësve u premtoi se do tu jepet statusi i naftëtarit.

Kompania IRTC e cila menaxhon rafineritë e naftës në Ballsh e Fier, do të largohet. Ministri i financave dhe Ekonomisë Arben Ahmetaj ftoi të gjitha kompanitë e interesuara që të sjellin propozimet në lidhje me këtë kompani. Ahmetaj u shpreh se do të presin propozime serioze për rafineritë e përpunimit të naftës në Ballsh e Fier.

Ahmetaj: Qeveria qëndron e angazhuar, e  vëmendshme për të mbështetur çdo investitor serioz që do të vijë me një projekt serioz për zhvillimin e biznesit në rafineritë e Balshit dhe të Fierit.

Ndërkohë që punonjësve u premtoi dhënien e statusit të naftëtarit dhe statusin e papunësisë.

Ahmetaj: Në qarkun e Fierit dhe zyrat përkatëse në qytetet përkatëse të jenë në ndihmë, në shërbim të punonjësve të dy rafinerive për ti ndihmuar në aplikimin e statusit të papunësisë.

Po për Erjon Braçen një tjetër zë mjaft i rëndësishëm në maxhorancë zgjidhja për punonjësit  dhe kompaninë ARMO do të ishte shtetëzimi.

Braçe: Zgjidhja duhet të jetë shtetëzimi i kompanisë, shteti të marrë asetin përsa kohë kompania nuk ka mundësi të shlyejë detyrimet që ka përkundrejt shtetit.

Nga largimi i IRTC preken rreth 1300 punonjës të cilët kanë protestuar disa herë duke kërkuar pagat e prapambetura si dhe sigurimet shoqërore.Dy rafineritë e naftës në Ballsh kanë ndërruar pronar disa herë ndërsa ka pasur mungesë transparence në kalimin e aksioneve

EMISIONET