Përzgjidhet lista e re për anëtarët e KLGJ dhe KLP, opozita: Nuk e votojmë

Pas rrëzimit në Kuvend, nën-komisioni ad-hoc zgjodhi listën e re për Këshillin e Lartë Gjyqësor dhe atë të prokurorisë, por duket se fatin e ka të njëjtë,  pasi opozita njoftoi sërish votë kundër në parlament. Oerd Bylykbashi tha se nuk i bashkon votat kurrë me mazhorancën për këta emra ndërsa e cilësoi procesin të delegjetimuar. Por Ulsi Manja tha se opozita po pengon reformën.

Nën-komisioni paralamentar “ad-hoc” zgjodhi me short listën e re për Këshillin e Lartë Gjyqësor dhe Këshillin e Lartë të Prokurorisë, por sërish fati është i njëjtë, opozita deklaroi votë kundër që do të thotë rrëzim i sigurtë në Kuvend.

Bylykbashi: Harroje që ne mundet të ngatërrojmë sot votat bashkë.

Por pavarësisht rezervave me integritetin e disa prej anëtarëve, Oerd Bylykbashi tha se problemi më i madh është procesi i ndjekur për përzgjedhjen e këtyre kandidatëve.

Bylykbashi: Nuk ka lidhje me individët, ndonjë mund të ketë probleme të rënda me moralin e shoqërisë. Por shumë veta janë profesionistë, ama procesi është bërë llum prej jush dhe ata marrin koston e kësaj. Sa më shumë ta trazoni dhe kjo është hera e dytë që e trazoni, aq më shumë ngrihet llumi.

Por mazhoranca thotë se opozita po bllokon reformën në drejtësi.

Manja: Nga dita e parë dhe dita e fundit, opozita kërkon të zbarrisë procesin e zbatimit të reformës në drejtësi. Edhe kjo që po bën me kandidatët është një lojë e opozitës për të deligjitimuar procesin, për ta çuar në pikën zero dhe për të bllokuar zbatimin e reformës në drejtësi.

Ndërkohe nën-komisioni ad-hoc skualifikoi nga gara kandidatin e propozuar nga shoqëria civile për Këshillin e Lartë Gjyqësor, Altin Hazizaj, pasi Prokuroria e Përgjithshme i ka drejtuar Kuvendit një shkresë ku thuhet se ai  është në konflikt me ligjin e dekriminalizimit.

Ndërkohe avokati Sajmir Vishaj është tërhequr si kandidat për Këshillin e Lartë Gjyqësor, ndërsa në letrën dorëzuar Kuvendit thotë se nuk pranon të jetë zgjedhje e shortit me gogla,  por besonte në përzgjedhjen e tij nëpërmjet nje dakortësie politike.  

Në rast se lista rrëzohet sërish, në procedurën e tretë edhe në mungesë të konsensusit, lista cilësohet e miratuar.

LISTA

Dy kandidatët nga trupa e avokatisë për anëtarë të KLGJ

Fatos Lazimi

Fatmira Luli

Dy kandidatët nga trupa e pedagogëve  për anëtarë të KLGJ

Maksim Qoku

Mirela Bogdani

Kandidatja e shoqërisë civile për anëtare e KLGJ

Naureda Llagami

Kandidatë nga trupa e avokatisë për anëtarë të KLP

Gëzim Allaraj

Fjoreta Xhimi

Kandidatë nga trupa e pedagogëve për anëtarë të KLP

Eneida Sema

Genti Ibrahimi

Kandidati nga shoqëria civile për anëtarë të KLP

Andi Murataj