Gjenden rrënojat e avionit luftarak japonez
Janë gjetur rrënojat e avionit luftarak japonez F-35, një ditë pasi u zhduk nga radarët mbi Oqeanin Paqësor.
Piloti i avionit nuk është gjetur ende, thanë zyrtarët ushtarakë japonezë .
Pjesë të avionit u gjetën gjatë operacioneve të kërkimit në det. Nuk dihet ende arsyeja pse u rrëzua avioni, i cili është prodhuar më pak se 1 vit më parë.
Mjeti fluturues u zhduk nga radarët rreth orës 19:27 të martën teksa po fluturonte 135 km në lindje të Misawa, një qytet në Japoninë veri-lindore.
Avioni humbi kontaktet rreth 30 minuta pasi u ngrit nga Baza Ajrore Misawa.
Sipas ministrit të mbrojtjes, Takeshi Iwaya, piloti i zhdukur u kishte dërguar një sinjal për të ndërprerë misionin. Por të gjitha komunikimet me të u humbën pak pas.
Ekipet e shpëtimit po vazhdojnë kërkimet për gjetjen e pilotit, rreth 40 vjeç.