Festat e fundvitit duket se e kanë shkatërruar monedhën europiane në Shqipëri. Sipas kursit zyrtar të Bankës së Shqipërisë rezulton se një euro po shkëmbehet me 122 lekë. Ky vlerësohet se është niveli më i ulët në 10 vitet e fundit pasi në dhjetor të 2007 euro është shkëmbyer me 120 lekë.

Tirane- Monedha europiane arrin në nivelin më të ulët të dekadës së fundit.

Sipas të dhënave të kursit zyrtar të Bankës së Shqipërisë rezulton se një euro po shkëmbehet me 122 lekë duke arritur nivelin më të ulët të 10 viteve të fundit. 

Zhvlerësimi pritet të vazhdojë edhe më tej, pasi në prag të festave pritet dhe një fluks i emigrantëve që kthehen në atdhe. 

Aktualisht Banka e Shqipërisë ka ndërprerë operacionin e blerjes së eurove në treg duke argumentuar se një monedhë e dobët do të jetë një standard i ri në ekonominë shqiptare. 

Edhe ekspertët kanë sugjeruar që Banka e Shqipërisë të mos ndërhyjë në blerjen e eurove në treg pasi kjo nuk do të zgjidhte situatën e krijuar. 

Ndërkohë ata që përfitojnë nga kjo situatë janë qytetarët të cilët i kanë kreditë në monedhën europiane pasi ata paguajnë më pak për këstet mujore. Po ashtu edhe qeveria shqiptare që paguan më lirë interesat e borxhit të jashtëm. 

Ndërkohë  një euro e dobët dëmton rëndë eksportet shqiptare të cilët kanë pësuar humbje të mëdha. 

Efekte në nënçmimin e euros mendohet se  ka pasur gjithashtu edhe nisma e Bankës së Shqipërisë për de-euroizimin e ekonomisë shqiptare e cila ka dhënë efekte psikologjike por njëkohësisht edhe një shmangie më të madhe të aktorëve të tregut ndaj monedhës europiane. 

/Ora News.tv/