Historia që do ju tregojmë nuk është nga ato telenovelat turke, por histori reale. Nusja helmoi vjehrrën me bar miu duke i thënë se ishte ilaç që hoxha i kishte dhënë për të larguar syrin e keq dhe sherret që kishin përfshirë në shtëpi.

Ngjarja ka ndodhur në Kamëz në prill të vitit të kaluar. Ndoshta me peshën e fajit nusja vendos të rrëfehet tek një imam në Qytetin Studenti, i cili e regjistron me video dhe audio. Më pas ia tregon familjarëve të gruas.

Videon e sheh dhe djali, Oltjani i cili menjëherë bën denoncimin në polici.

Mbremjen e sotme është arrestuar nusja për veprën penale “Vrasje për shkak të marrëdhënies familjare, si dhe tre persona të tjerë për moskallëzim krimi, mes tyre imami dhe vjehrri i të akuzuarës.

Ora News sjell dëshmitë e djalit në prokurori dhe çfarë rrëfeu nusja tek imami. 

Historia

Marjana Çmeta ishte nuse shpie në familjen e Oltjanit që prej majit të 2016. Por zënkat mes nuses dhe djalit dhe vjehrrës ishin të shumta. Madje një ditë mes nuses dhe vjehrrës kishte pasur dhe konflikt fizik.

Dëshmia e djalit, Oltjan Lami: "5 muaj para vdekjes së mamasë, Marjana dhe mami janë zënë fizikisht. Ka qenë Marjana që e ka kapur për flokësh mamanë time dhe janë gjuajtur. Kam ndërhyrë unë për ti ndarë. Babai i tha Marjanës të ikte nga shtëpia dhe ajo është larguar për 5 ditë, pastaj është kthyer prapë pasi babai im Agimi e fali.

Ishte 30 prill 2017 Ora 06:30: Marjana kishte hyrë në banesë shumë shpejt. Natën e kishte kaluar tek familja e prindërve ndërsa në mëngjes ishte kthyer në banesë për të përcjellë të shoqin për në punë.

Ora 10:00 Lirija kthehet në banesë pasi kishte shpërndarë qumështin dhe më pas shkon në bahce për të mbjellë fidanë me domate.

Kur hyri në banesë Marjana i thotë se do i jepte një ilaç që e shëron nga të këqijat por që kishte pak erë dhe Lirija pranon.

Nusja kishte bërë lëng portokalli në të cilën kishte hedhur helm për mijtë (fostoksinë).

"Në video Marjana thoshte që mamanë e kishte vrarë. Ditën kur kishte vdekur mamaja në mëngjes Marjana kishte bërë lëng portokalli në të cilën kishte hedhur helm për mijtë. E kishte përgatitur në gotë dhe ja kishte ofruar mamasë sime duke i thënë që ishte një i përgatirur nga një hoxhë. I kishte thënë që këtë lëng e kishim pirë të gjithë dhe se do na bënte mirë për të mos patur probleme. E kishte siguruar se e kishim pirë të gjithë"  thuhet në dëshminë e bashkëshortit të Marjanës, djalit të viktimës.

Më pas donte ta mbyste edhe me shall 

Gjëndja shëndetësore e Lirijes nis të përkeqësohet dhe më pas nis të villte. Pas rreth një ore pasi i kishte dhënë lëngun Marjana shkon tek dhoma e vjehrrës për të parë gjëndjen dhe vë re se ishte akoma gjallë.

E gjen në një cep të krevatit.

"Mamaja e kishte parë me një shikim të vrazhdë dhe për këtë  kishte menduar se helmi nuk kishte bërë efekt" - i ka rrëfyer hoxhës Marjana kohe pas krimit.

Shkon tek dhoma e saj e gjumit merr një shall dhe i lidh në fyt mamasë për ta mbytur.

Nuk kishte mundur ta shtrëngonte dot pasi vjehrra kishte vënë dorën ndërmjet shallit dhe fytit. Lirija kishte dashur të hapte dritaren për të thirrur për ndihmë nusen e xhaxhait, por Marjana e kishte kapur me thonj për buzësh dhe nuk e kishte lënë të bërtiste dhe të hapte dritaren.

Cfarë ndodhi?

Sipas hetimeve: Marjana pasi ka shkuar tek dhoma e saj dhe ka parë nga dritarja që nusja e xhaxhait ka qenë aty pranë  e frikësuar ka shkuar në dhomën e Lirijes dhe ka kërkuar ta mbysë me shall.

Perleshja vjehërr nuse

Ajo e ka lëvizur Lirijen nga dhoma e gjumit për në dhomën tjetër pasi Lirija kishte filluar të bërtiste dhe i ka zënë frymën me duar duke e mbytyr. Ato janë përleshur me njëra tjetrën gjatë lëvizjes nga dhoma e gjumit të Lirijes për në dhomë tjetër, thuhet në dosjen hetimore.

Marjana e kishte kafshuar dhe ishin kacafytur në korridorin e shtëpisë. Madje në rrëfimin para hoxhës Marjana tregonte se "mamaja kishte patur shumë fuqi."

Më pas, nusja ka shkuar tek xhaxhai i Oltjanit duke thënë se Lirija ishte sëmurë por pa treguar fare se çfarë kishte ndodhur.  Bukurie dhe Vehbi Lami së bashku me nusen e kanë dërguar trupin e 48 vjeçares në spital. Në orën 14:00 Lirija Lami mbërrin e vdekur në spital

Dëshmia e Marjanës në prokurori

Dy herë është marrë në pyetje nusja e cila ka dhënë të dhëna kontradiktore.

Dëshmia Marjanës : Në orën 10:00 vjehrra po mbillte disa rrënjë domate në kopësht. Është ndjerë e lodhur dhe është futur në dhomën e saj për të pushuar. Ajo më tha nëse e kërkon ndonjë person thuaji se nuk është këtu pasi ishte e lodhur. Më pas ajo është shtrirë tek krevati. Pasi ka qëndruar rreth një orë në krevat duke pushuar unë kam shkuar tek dhoma e saj dhe e kam gjetur të ulur në tokë dhe ajo kishte vjedhur tek legeni dhe në këtë moment ajo ishte shtrirë në gjëndje të fikti dhe pa ndjenja.  

  E pyetur për marrëdhëniet me vjehrrën ajo ka treguar në prokurori se ka pasur marrëdhënie të mira.

"Por se atë ditë kishin pasur konflikt. Marjana bënte me faj vjehrrën si shkak i konfliktit me bashkëshortin e saj dhe atë ditë kishin pasur një konflikt dhe në momentin kur vjehrra e saj kishte dashur të largohej nga banesa ato ishin shtyrë me njëra tjetrën dhe kjo e kishte kafshuar. Në një moment Marjana tregon se vjehrra e kishte shtyrë me duar dhe ajo kishte ndjerë dhimbje në pjesën e barkut pasi në atë kohë kishte qenë shtatzënë në muajin e pestë. 

"Mua më kanë filluar dhimbjet e barkut dhe në këtë çast  i kam thënë vjehrrës nëse më gjen gjë fëmijën je ti shkaktarja".

Më pas ajo ka treguar se ka qëndruar në dhomën e saj dhe ka dalë në kohën kur vjerrha e saj duhej të dilte në fshatin Bovillë për të sjellë qumështin e lopës. Pasi dalë ka parë vjerrhën të shtrirë në krevat"

Varrimi dhe si u zbulua helmimi

 Pas ceremonisë së lamtumirës të afërmit kanë parë skedën e vdekjes. Aty kanë konstatuar se shkaku i vdekjes ka qenë helmimi me lëndë helmuese dhe jo nga ataku kardiak.

Dyshimet se vdekja e saj kishte ndodhur në rrethana të paqarta detyruan policinë gjyqësore të shkonte ne banesë per te mbledhur provat. Ekspertiza mjeko ligjore e datës 23 maj 2017 zbulon se vdekja e 48 vjeçares kishte ardhur nga helmimi me lëndë fostoksinë.

Rrëfimi tek imami 

Ndërkohë Marjana ishte larguar nga banesa. Një ditë  ka shkuar tek Hysen Shehu i cili ishte imam në xhaminë e qytetit Studenti dhe i ka rrëfyer ngjarjen.

Imami ka regjistruar me audio e video rrëfimin dhe ia ka treguar Oltjanit. Ky i fundit kishte shkuar ta takonte i mërzitur pasi kishte mësuar se nënën ia kishin helmuar por nuk dinte se kush ishte autori.

"Unë do të të bind ty që nënën tënde e ka vrarë nusja"- i ka thënë imami. 

Hysen Shehu mori një USB që e kishte futur poshtë raftit të librave dhe e vendosi në lap top dhe më tha: Hajde të shohësh një video që i kam bërë Marjanës"- ka dëshmuar Oltjani 

Pasi ka dëgjuar të gjithë rrëfimin Oltjani është paraqitur më 26 janar 2018 në prokurorinë e Krimeve të Rënda dhe ka bërë denoncimin.

 Videoja është parë nga vjehrri Agim Lami dhe Arben Lami djali i xhaxhait i Agimit por nuk kanë kallëzuar krimin në prokurori. Ata akuzohen për "moskallëzim krimi" 

Marjana Cerma akuzohet për "vrasje për shkak të marrëdhënieve familjare"

(Në foto: Viktima)

/Ora News.tv/