E sajuar me qëllim përfitim azili në BE. Këtshu ka rezultuar ngjarja e 12 majit në Vlorë, ku një 24 vjeçar denoncoi se u sulmua me armë zjarri në makinën e tij në aksin Levan-Vlorë. Por verifikimet e policisë provuan se në fakt e gjitha ishte një sajesë dhe për këtë Romarjo Aliraj përfundoi në pranga bashkë me një bashkëpunëtor.

Ngjarja që u raportua si atentat në fakt ka rezultuar të jetë një ngjarje e sajuar për interesa përfitimi.

Policia e Vlorës ka zbardhur ngjarjen e 12 majit kur 24 vjeçari Romarjo Aliraj, denoncoi se e sulmuan me armë zjarri në aksin Levan-Vlorë.

Si provë në vendngjarje u shkrehën 29 plumba dhe makina me të cilën udhëtonte i riu ishte nxjerrë jashtë rruge.

Por pavarësisht breshërisë së plumbave ai kishte shpëtuar pa dëmtime dhe menjëherë më pas e orientoi policinë edhe drejt pistave të konflikteve të së shkuarës.

Këtu duket se kanë lindur edhe dyshimet e para të policisë e cila me anë të hetimeve të thelluara, provoi se ishte përpara një ngjarje të sajuar me prova të manipuluara.

Për këtë Aliraj, i njohur për një të shkuar me precedentë penalë kishte bashkëpunuar me një 55 vjeçar.

Në bashkëpunim ata kishin përgatitur dhe realizuar ngjarjen dhe qëllimi sipas burimeve ishte përfitimi i azilit në vendet e Bashkimit Evropian.

Por plani u zbulua dhe të dy përfunduan në prangat e policisë së Vlorës. Sipas policisë Aliraj duhet të ishte në arrest shtëpi për drejtim të mjetet në mënyrë të parregullt, por edhe këtë masë ai e kishte thyer dhe u arrestua duke lëvizur në qytet.

Burime pranë grupit hetimor thonë se po punojnë për sqarimin e roleve të dy të arrestuarve dhe personave të tjerë të përfshirë në këtë skemë përfitimi duke rikthyer breshëritë e plumbave dhe njoftimet për atentat në një kohë kur Vlora ishte e trazuar nga ngjarjet kriminale.

/Ora News.tv/