"Dëshmi" për negociatat? Xhafaj: Goditja ndaj krimit jo çështje fushatash

"Dëshmi" për negociatat? Xhafaj: Goditja ndaj krimit jo

Ministri i Brendshëm, Fatmir Xhafaj deklaroi nga Korça Shqipëria është vlerësuar në të 5-ta prioritetet nga Komisioni Evropian, përfshirë këtu luftën kundër krimit dhe korrupsionit. I pyetur nëse Ministria e Brendshme duhet të japë "dëshmi" në prag të vendimit të qershorit për çeljen e negociatave, Xhafaj tha se lufta ndaj kriminalitetit nuk bëhet me fushata, por shtoi se operacioni "Forca e Ligjit" ka dhënë rezultate pozitive.

Xhafaj: Unë besoj që  edhe korrupsioni, edhe krimi i organizuar, nuk është një çështje që goditet me fushata, as një çështje punë orësh apo punë ditësh, përkundrazi. Janë të dyja vepra penale ose ajo lloj veprimtarie kriminale që kërkon një punë goxha të vështirë për ta identifikuar dhe për ta provuar si të tillë. Por nëse e shohim nga pikëpamja e rezultateve, për të gjithë tashmë është i qartë fakti që jo thjeshtë ajo çfarë themi ne, por ajo çfarë thonë Komisioni Evropian, është e zeza në të bardhë dhe vlerësimet për atë çfarë është duke u bërë në këtë fushë dhe sidomos në çështje në lidhje me luftën kundër krimit të organizuar, edhe në kuadrin e operacionit ‘Forca e Ligjit’, janë pozitive.

Natyrisht ka vend edhe për shumë më mirë dhe ne jemi fort të angazhuar që krahas arritjeve të deritanishme të mund të demonstrojmë më shumë, jo thjesht vullnet dhe angazhim, por rezultate konkrete edhe në muajt që do të vijnë.

-Këto arritje do të mund të bindin vendet skeptike europiane?

Xhafaj: Besoj se skepticizmi i tyre nuk lidhet thjesht me prioritete. Është një çështje, një debat i madh brenda vendeve evropiane, brenda forcave politike të vendeve të ndryshme, sepse përsa i përket çështjeve që lidhen me treguesit që do të duhet të plotësonte është shprehur Komisioni Evropian. Në fund të fundit ai që e ndan se cila është shkalla e plotësimit të këtyre prioriteteve është Komisioni Evropian dhe Komisioni Evropian e ka dhënë në mënyrë unanime verdiktin e tij për 5 prioritetet. Mbetet pastaj çështje vullneti nga të gjitha vendet anëtare për ta ratifikuar këtë vullnet të Komisionit Evropian. Në vlerësimin tim personal, unë besoj se do të ketë një rezultat pozitiv dhe duhet të ndihemi mirë të gjithë për këtë gjë, të gjithë ata që duan ta shikojnë vendin dhe qytetarët e këtij vendi shumë më mirë sesa deri tani.

EMISIONET