Kapsollë, vezë dhe tymuese te Bashkia, banorët e Astirit: Banesat do i mbrojmë me gjak!

Në ditën e 12 të protestës së tyre, banorët e “Unazës së Re” kanë dalë sërish para Bashkisë së Tiranës për të kundërshtuar prishjen e banesave që përfshihen nga projekti i qeverisë. Ata këmbëngulin të kërkojnë takim me kreun e bashkisë, Erion Veliaj dhe kryeministrin Edi Rama. Nuk munguan përplasjet dhe incidentet me policët bashkiakë.

Banorët e Unazës së Re hodhën kapsollë, tymuese dhe vezë dhe bënë thirrje kundër kryebashkiakut Erion Veliaj, ndërsa qëndruan para bashkisë për më shumë se 1 orë, duke kërkuar dëmshpërblim të plotë për pronat e tyre që preken nga zgjerimi i rrugës.

Protestuesit, kërkuan reagimin e bashkisë dhe qeverisë, ndërsa theksojnë se në çdo rast do ti mbrojnë me gjak pronat e tyre.  

Në mbështeje të protestuesve ishin dhe anëtarët e PD-së dhe të LSI-së në këshillin bashkiak të Tiranës si dhe deputetë të Partisë Demokratike.

Pas më shumë se 60 minuta më parulla dhe thirrje kundër kryebashkiakut dhe kreut të qeverisë, banorët u shpërndanë, duke vendosur si orar proteste të premten në orën 17:00 në Unazë të Re.


Ora News ndoqi LIVE protestën e banorëve

Ora 12:19 Përfundon protesta dhe mbledhja e këshillit bashkiak

Ka përfunduar protesta dhe mbledhja e këshillit bashkiak. Protestuesit u larguan drejt banesave të tyre duke paralajmëruar se nuk do të ndalen derisa të marrin zgjidhje për problemin e tyre.

Ora 12:06 Përgatitje për djegie gomash

Protestuesit kanë marrë me vete dy goma, të cilat i kanë vendosur në një hapësirë bosh që i ndan ata dhe policinë. Nuk dihet nëse protestuesit do tu vënë flakën.

12:04 Protestuesit thirrje qeverisë e bashkisë për dëmshpërblim

Vijon e qetë protesta e banorëve të "Astirit" para bashkisë së Tiranës. Ata i bëjnë thirrje kryebashkiakut të Tiranës, Erion Veliaj, të marrë vendim në këshillin bashkiak për ti dëmshpërblyer 100% për banesat e tyre që preken nga projekti për zgjerimin e Unazës së Re.

Ora 11:51 Një qytetar ndihet keq

Një nga protestuesit është ndier keq. Në protestë ka edhe gra dhe fëmijë.

Ora 11:43 Banorët tentojnë të hyjnë me forcë në bashki

Tensione mes banorëve dhe policisë. Me tymit të flakadanëve, banorët po shtyjnë policët për të depërtuar tek dera e bashkisë. Vlen të theksohet se dera është e mbyllur. Ndërkohë shihet dhe një zjarr i vogël te dera.

Ora 11:42 Këshilltarët e djathtë mbështesin protestën

Kryetari i këshilltarëve PD-së, Kreshnik Çollaku u shpreh: Patjetër jemi në mbështetje të protestuesve. E drejta e jetës dhe e banesës janë të drejta themelore.

Ora 11:40 Shtëpitë do i mbrojmë me gjak

"Duam shtëpitë tona, duam pronat tona" është thirrja kryesore që vjen nga protestuesit.

Protestuesit për mikrofonin e Ora News u shprehën: banesat do i mbrojmë me gjak. nuk duam rrëzimin e qeverisë, kërkojmë dëmshpërblim.

Protestuesi: Ju bëjmë thirrje mos lozni me gjakun tonë. Banojmë në Unazën e Re dhe ai sot të vijë pas 30 viteve të na prishë shtëpinë.  Kush është ky burrë? Nuk tërhiqemi derisa të vdesim këtu. Nuk po kërkojmë të rrëzojmë qeverinë. Duam shtëpinë tonë. U bëj thirrje protestuesve të mos tërhiqen.

Ora 11:37 Protestuesit hedhin tymuese para bashkisë Tiranë 

Teksa policia kishte marrë masa për ti mbajtur larg derës së bashkisë, banorët e "Astirit" i janë përgjigjur me tymuese.
Protestuesit hodhën flakadanë, kapsolla dhe vezë në drejtim të godinës. 




Kliko ketu per FOTOGALERINE


Dita e tretë para bashkisë, policia blindon derën

Banorët e zonës së "Astirit" kanë zbarkuar sot sërish para bashkisë, duke protestuar kundër prishjes së banesave të tyre.

Ata kërkojnë takim me përfaqësues të bashkisë Tiranë për të gjetur një zgjidhje që çon në shpronësimin e tyre.

Pronarët e objekteve të palegalizuara kanë refuzuar ofertën e kryetarit të bashkisë Tiranë Erion Veliaj për mbulimin e 3 viteve qira.

Ndërkohë marrë shkas nga incidenti i fundit në dyert e Bashkisë, policia ka marrë masa duke krijuar një kordon që në oborrin e institucionit.

Për projektin e Unazës së Madhe parashikohet që të prishen 317 objekte, 163 prej të cilëve janë në proces legalizimi dhe do të skualifikohen dhe 123 janë me vërtetime pronësie. 

Mes banesave që janë prekur nga plani dhe pritet që të prishen është edhe ajo e Nexhmije Hoxhës, bashkëshortes së ish-udhëheqësit komunist, Enver Hoxha

 

EMISIONET